Осындай қыз кімде бар?
Осындай қыз кімде бар?
Ешкімде жоқ, бізде бар.
Күлкісіннен Күн күліп –
Жердің жүзі нұрланар!..
Осындай қыз қайда бар,
Жерде жоқ, тек Айда бар.
Ажарынан Айдың да
Көрсе тілі байланар!
Шынар ма екен, тал ма екен,
Шекер ме екен, бал ма екен?
Ал білсеңдер, айтыңдаршы –
Осындай қыз бар ма екен?!
* * *
Қызым менің қайда екен?
Асқар-асқар тауда екен.
Онда неғып жүр екен? –
Жұлдыз теріп жүр екен!..
Қызым менің қайда екен?
Гүл жайнаған бауда екен.
Онда неғып жүр екен?
Бұлбұлдармен жарысып –
Әнге салып жүр екен!..
Қызым менің қайда екен?
Аспанда екен, Айда екен...
Онда неғып жүр екен?
Күн жетектеп, Ай мініп –
Асыр салып жүр екен!..
Қызым менің қайда екен,
Қайтар ойы бар ма екен?
Әлде, еркемнің әлі де –
Ойны қанбай жүр ме екен?!
* * *
Қызым менің қандайсың,
Ойнақтаған лақтайсың
Бір сәт тыным таппайсың–
Тәтті ұйқыға жатпайсың!..
Қызым менің қандайсың,
Шырын-шекер, балдайсың!..
Ойынға бір тоймайсың–
Көз шырымын алмайсың!..
Қызым менің қандайсың?
Толықсыған Айдайсың,
Күлімдеген Күндейсің –
Арайланған таңдайсың!..
Қызым менің қандайсың,
Қызғалдақтай жайнайсың!
Жұпарымсың сен менің –
Жұтсам мейір қанбайтын!..