Сен жайлы

Өкінішпен өрілген тағдырымда

Ойды зарға көмдіріп,жанды мұңға

Мен өмірге келгенмін есіміңді

Бұл әлемге өлең қып қалдыруға

 

Себебі, сен күн едің,көктем едің

Көңілімді көтерген көкке менің

Менің қатем екен-ау сені сүйіп,

Ал өзімді сүйікті етпегенім

 

Несіне енді бұлай деп ақталамын

Көздеріңнен күнәсіз бақ табамын

Сені қалай жырлаудың керектігін

Мен ешкімнің жырынан жаттамадым

 

Оны маған үйреткен өзің ғана

Сенім-қайғы,көңіл-мұң,сезім-нала

Енді менде қалғаны үміт қана

Енді маған керегі төзім ғана

 

Шаттығымды шарасыз кез ұрлайды

Өзіңді әйгі қыламын,сезімді әйгі

Ғашықтардың гимні боп жер бетінде

Бір ұлы өлең қалады өзің жайлы